Марий тиште кече

  Латикымше декабрьыште Чуксола книгагудышто Марий тиште кечылан пӧлеклалтше “Марий тиште кече” лӱман мероприятий эртаралтын. Тӱҥалтыш классыште тунемше йоча-влак  тиде пайрем кече нерген келгынрак пален налыныт. Ончыч марий калык могай знак-влакым кучылтын да кушан возен, тотретпуч молан кӱлын, марий тӱр мо нерген каласкала, икымше марий грамматике кунам савыкталтын, ко икымше марий почеламутым возен да тулеч молымат. 

  С. Г. Чавайнын “Ото” почеламутшым чыланат йӱкын лудынна. Тыгак йоча-влакым “Марла календарь” дене палдаренна. Марий йылмым тӱзатымаште шуко шымлызе, поэт ден писатель-влак тыршеныт. Нунын кокла гыч Валериян Васильев, Я.Майоров-Шкетан, Олык Ипай, Шабдар Осып, Яныш Ялкайн да молат кугу надырым пыштеныт.

  Икымше йӱкан киношто марий актёр Йыван Кырла нергенат йоча-влаклан каласкаленна. Йыван Кырлан возымо “Шочмо кече” почеламутшым шарналтенна. Вашлиймашым “Книга” почеламут дене иктешлышна. Йоча-влаклан шке шочмо йылме деч вожылаш огыл, а мӧҥгешла кугешнаш кӱлмӧ нерген ойлышна. “Ме марий улына, марла ойлена кеч мӧҥгыштӧ, кеч школышто, кеч уремыште” – тыгай шонымаш дене чыланат келшышт.

Л.И.Соколова, Чуксола книгагудын вуйлатыше