Ӱдырамаш пайремдене!

  Ӱярня тылзын кудымшо кечынже Чуксола книгагудо, тудын пелен «Поро кумыл» клубын участникше–влак    З.И.Салахова, В.К. Еросланова, Совет ветераным вуйлатыше Л.Н. Матвеева Шуйбеляк фермыште кызыт тыршыше да заслуженный канышыште улшо ӱдырамаш–влакым шушаш 8 март пайрем дене саламлаш миеныт. Изирак пӧлекым, мут да муро саламым намиеныт. А тушто нуным ӱстембал тич темше чес дене порын вашлийыныт. Совет ветеран лӱм дене Л.Н. Матвеева чыла ӱдыр, ӱдырамаш-влакым шушаш пайремышт дене шокшын саламлыш, шуко поро мутым ойлыш. З.И. Салахова ден В.К. Еросланова нунылан пӧлекым кучыктышт. Книгагудо пашаеҥ ава нерген изирак ойлымашым лудо, В. Гороховын «Илыза, авай – влак шуко» почеламутшым йоҥгалтарыш. Вара чыланат Эчан Калининын гармонь шокталтымыж почеш «Авамлан» мурым шергылтарышт.Тиде мурын мутшым С. Николаев возен, а семжым Э. Сапаев келыштарен. Сылне муро шукыштын кумылыштым тодыльӧ, шинчавӱдымат лукто. Чынак, ава тӱняште эн шерге айдеме. Тылат вич але витле ий лиеш гынат садиктак аван поро кумылжо, ласка ончалтышыже эре кӱлеш. Аралыза, ида мондо шке авадам пайрем дене саламлаш, унала миен толаш, илымышт годым нуным чаманаш да перегаш кӱлеш. 
Шуйбеляк фермыште тыршыше — влакым эше ик сюрприз вучен. «1 Май» колхозын правлений лӱм дене тӱҥ энергетик В.А. Богданов ден тӱҥ агроном А.Н.Курбатов кажныштлан роза пеледышым да пакет тич пӧлекым кучыктышт, шушаш пайремышт дене саламлен шуко сай тыланымашым ойлышт, ӱдырамаш–влакын кумылыштым нӧлтышт.
Тачысе кече дене пайдаланен, чыла ӱдыр, ӱдырамаш–влакым шушаш 8 март пайрем дене шокшын саламлена да тыланен кодына нимучашдыме ласка илыш корным, кумда нурла шарлен вочшо кугу пиалым, кӱ курык гай пеҥгыде тазалыкым, вуй ӱмбалне турий сем дене темше канде кавам, чон ласкалыкым да весела пӱрымашым. Тек пайрем кумылда эрелан ушешда.

Л.И.Соколова, Чуксола книгагудын пашаеҥ