Пайрем дене, пӧръеҥ-влак!

Пургыж тылзын коло кокымшо кечынже Чуксола книгагудо, тӱвыра пӧрт да Совет ветеран дене пырля Элым Аралыше кече вашеш «Пайремда дене, пӧръеҥ-влак» саламлымаш кас эртен. «Поро кумыл» клубыш коштшо ӱдырамаш-влак пӧръеҥ шамычлан пеш сай пайрем шӱлышым пуртеныт.

Уна-влаклан шуко саламлымаш — шомак-влак йоҥгеныт. Чуксола кундем гычын Элым аралымаште Кугу Ачан сарыште шке вуйыштым пыштыше да илыше кодшо салтак-влакым порын шарналтенна. Тӱвыра пашаеҥ Зоя Ивановна Демидова Афганистан ден Чечняште служитлыше рвезе-шамыч нерген кумылын каласкален. Вӱд йымалне ийын коштшо «Курск» пушышто кугу трагедий лийын. Тушто Чуксола ялыште шочын-кушшо Иванов Василий Эльмаровичын ӱмыржӧ кӱрылтын. Тудын подвигшымат ойлен коденна. Элнам аралымаште шуко удыр-рвезе  влак ужар вуйыштым пыштеныт. Нуным шарналтен, ик минут жап чыланат шып шогенна.
Вара пайрем касна тамле сий дене темше ӱстелтӧрыштӧ шуйнен. Тӱрлӧ модыш, мурымаш да курштымаш пӧръеҥ-влакын кумылыштым чотак нӧлтыш. Выставкылаште улшо книга-влакымат ончышт, лудыч, икте-весе дене мутланен шинчылтыч. 
Иктат пайрем гыч пӧлек деч посна ыш кае. 
Пӧръеҥ-влаклан пӧлеклалтше пайремым эртараш полшымыштлан Аркадий Арсентьевич Новиковлан, Совет ветеран-влакын секретарьже Зоя Ивановна Салаховалан кугу таум каласена. Тачысе кече дене пайдаланен чыла пӧръеҥ-влакым Элым Аралыше кече дене шокшын саламлена, кужу ӱмырым, еш пиалым, вуй ӱмбалне канде кавам тыланен кодына. Пайремда дене!

Л.И.Соколова, Чуксола книгагудын пашаеҥже