Сеҥымашлан — 75 ий!

Илышаш кечем улмаш

Вурс гыч ыштыме салтак,

Вурс гыч ыштыме апшат

Йӱдшӧ -кечыже шогат,

Тыныс илышым таптат.

Толын паркыш чал коча,

Сугырген туп ден шога.

Вуйым ӱлыкӧ сакен,

Шинчавӱдшӧ шып йоген.

Мыняре лийын кредалмаш,

Мыняре лийын сеҥымаш!

Шӱм, коржын, кызытат эҥеш…

Ышт пӧртыл шукыжо мӧҥгеш.

Оҥ тич тудо орденан,

Эҥ ертен кучен тоям.

Лӱдын огыл тушман деч…

Салтакым умылаш йодеш:

«Мыйын огыл титакем:

Кодым илыше, шоляш…

Пытышым мый сусырген,

Илышаш кечем улмаш…»

Тачат тӱняште шургымаш,

Йот эл кокла ӱчашымаш.

Мер калыклан чучеш азап –

Огеш кӱл сар, кӱлеш келшаш.

Иза-шоляш, ака-шӱжар –

Йолвак шогал, йырваш ончал.

Эн шерге Эл мемнан шӱмеш

Ава шӧр ден, шочмек, пижеш. 03.02.2018.

2019 ийыште Нина Щербакован кокымшо книгаже «Шӱмет шӱмемым паремда» савыкталтын. Тыште автор шке темыжым умбакыже шуя – йӧратымаш, пӱртӱс, шочмо вершӧр нерген кумыл ойжым почаш тырша. 

«Илышаш кечем улмаш» почеламутым поэтесса Кугу сарын ветеранже-влаклан пӧлеклен. Нина Гавриловна 10 почеламут сборникжым мыланна пӧлеклен коден. Авторграфшым кажне книгаште  муаш лиеш. Пеш кугу тау!