Шарнымаш кас

«Ош т ӱня дене чеверласыше айдемым ик еҥ шарна гынат, тудо ила…» Калык мут.

Марий Элын сулло артистше Владимир Семенович Янгабышев ила гын, тудлан  нылымше мартыште 80 ий темеш ыле. Тудым шарныме лӱмеш Тошто Торъял книгагудо пелен шарнымаш касым эртарышна. Тудын илыш-корныжо, театрыште пашам ыштымыже, могайрак тудо айдеме лийын, тидын нерген кӱчыкын книгагудо пашаеҥ Ю.Соболева радамлен пуыш. Владимир Янгабышев кумло вич ий Марий театрын сценыштыже  шӱдӧ утла рольым модын, шуко чапле образым чоҥен. Мутлан: Айдуш (С.Чавайн «Акпатыр»), Стапан (М.Рыбаков «Морко сем»), Азамат (С.Николаев «Айвика»), Эчук, урядник (С.Николаевын «Салика» комедий), туныктышо Мичи  (С.Г. Чавайнын «Мӱкш отар» драмыште) да шуко-шуко молат.

 – Илышыште Владимир Семенович пеш проста, ласка кумылан, поро дечат поро чонан айдеме  лийын. Шкенжым эре арун кучен, шала койышым ончыктен огыл, осал шомакым тудын деч колалтын огыл. Тудын кап-кылжат пеш лывырге, чурийжат мотор ыле, йӧратеныт тудым изижат-кугужат,  — тыге шарнен возат пырля ыштыше йолташыже-влак.

  Театр илышышке изи огыл надырым пыштен. Ӱмыржӧ гына тудын пешак кӱчык лийын, улыжат 64- ий ош тӱняште илен. Ме,Тошто Торъялысе  калык,  шкенан талантан артистнам, Пеледыш ял рвезым,  шарнен илена да тудын мастарлыкше дене кугешнена!

  Владимир Янгабышевым шарныме лӱмеш ветеран-влак  «Телеграмма» лӱман спектакльым модын ончыктышт. Эх, кертыт вет шке уста койышышт ден ончаш толшо-влакым шке векышт савырен.  Пеш устан модыч шке рольыштым М.Соколова (Елена Ивановна), Р.Торощина( Миклай вате ). Г.Чулкова (Люда), Л.Сидоркина (Люба), Г.Блинов (Вачий). Нӧлталтше кумыл дене, чон куан дене, порын чеверласышт ончаш толшо-влак.