Шарнена салтакым-фронтовикым

Латкандаш ияш жапнам,

Кумыл модмо пагытнам

Сар йӱлалтыш, ломыжшат шулен пытен.

Но садак пӧртылына,

Шӱлыкан пӧрт олмынам

Кеч вес тукымын

Сурт-пече  ынде сылнын тӱзатен.   Альбертина Иванова.

   Кажне кундемын шке пагалыме еҥже уло. Тудын дене ик тукым веле огыл кугешна, тудын ыштыме пашаже, тудын илышыже шуко еҥлан пример семын кодеш. Меат ик тыгай еҥлан шотлена шкенан землякнам, Кугу сарын участникшым, «Прогресс» колхозын икымше председательже — Лев Максимович Торощиным. Ила гын, тений тудлан 95 ий темеш ыле. Тудым порын шарналташ да Кугу Сеҥымашлан 75 ий темме лӱмеш  верысе калык, пошкудо, тунемше-влак Тошто Торъял книгагудо пелен шарнымаш касым эртарышна. Касым сӧрастараш полшеныт ветеран–влак шке мурышт дене, а нылымше классыште  тунемше йоча-влак почеламутым  сылнын лудыныт. ӧрдыжеш кодын огыл «Тошто Торъял ял шотан ушем» вуйлатыше Н.И.Широбоков.

   Лев Максимович латкум ий колхозым вуйлатен. Тудын годым  ферме, вӱта-влак, идым, клат да тулеч молат чоҥалтыныт, колхоз илыш воран каен. Тудо жапыште пырля пашам ыштеныт: Н.А.Ельмекеев, Е.В.Торощин, В.А.Янгабышев, И.С.Садовин, И.Ф.Казанцев да моло-влакат. Вуйлатыше сомылым сайын ыштымыжлан шуко правительственный награда да медаль дене палемдалтын. Вашлиймашке толшо Блинов Г.Г, Богачев А.Н тудын нерген  пеҥгыде вуйлатыше, сай организатор, шке мутшылан оза да поро кумылан еҥ семын шарналтен ойленыт.

   Лев Максимович Торощин Кугу  сарын участникше лийын. Латкандаш ияш самырык рвезе 1943-ий январь тылзын  Ленинградский фронтыш логалеш, артиллерист лиеш. Элыштына шучко сар каен шога, орлык, шинчавӱд, колымаш озалана. Пеш неле лийын нылле нылымше ий. Ленинград олам аралмаште

илаш-колаш кредалеш мемнан землякна. Лев Максимовичын шарнымашыж гычын: «Мемнам чот бомбитленыт немыч-влак, ик бомбо ӱмбакынат толын возын ыле, но ала-могай амал дене пудешталтын огыл, илыше кодна. Марий  Эл гыч  40 ен лийынна. Ладыж ерым вончымо годым шке ял рвезым Соколов Иван Ильичым вашлийым, чот куанышым». «За оборону Ленинграда» медаль тудын икымше наградыже лийын, но тудлан чыла медальжат ик гай шерге лийыныт, —  вет медальым   сайын пашам ыштымылан да Элым аралымылан  ик металл гычак таптат, — ойлен мемнан землякна, салтак-фронтовикна.