«Поро кумыл» Тошто У ийым вашлиеш

   Шорыкйол тылзын 15 кечынже Чуксола книгагудо шке аланышкыже  «Поро кумыл» клубыш коштшо-влакым чумырен. Ме эртыше У ий, Рошто, Тошто У ий пайрем-влакым ожно кузе эртарыме нерген «Поро кумыл» клубын членже А.А. Пашина деч пален нална. Тудо тыгак нине пайремын кузе лекмышт нерген кӱчыкын палдарен кодыш,  ожнысо модыш-влак денат модыктыш, тамле шокшо кочкыш денат сийлыш. Алевтина пешак кумылзак, творческий шӱлышан ӱдырамаш, тӱрлым шонен лукташ пешак мастар. Тудын дене ме кугешнена да тыгай чапле пайремым пӧлеклымыжлан кугу таум каласена.

  Тыгак пайрем вашлиймашнам сылне муро-влак дене сӧрастараш Чуксола клуб вуйлатыше М.Ю. Анисимова полшен. Тудо уна- влакым кызытсе модыш-влак дене модыктен, такмак-влак почеш куштыктен да мурыктен.

  Мемнан коклаште «Поро кумыл» клубыш икымше гана толшо- влакат ыльыч. Нунылан пайрем касна пеш келшен, вес ганат толаш кумылышт уло.

  Мучашлан ваш-ваш изирак пӧлекым кучыктышна. Тыгеже пайрем кумыл чылаштын эшеат кӱшко нӧлталте, чонланат сай, весела лие.

  Тыгай нӧлталтше кумылан, южышт чонлан келшыше книга, журнал- влакым кидыш налын, моҥган-моҥгышкышт шаланен пытышт.

  У ий  дене чылаштым эше ик гана шокшын саламлена, илышыште тумо гае пеҥгыде тазалыкым, шокшо поро кумылым, ныжыл йӧратымашым, пашаште сеҥымашым, чон яндарлыкым чылаштлан тыланена да кумылан-влакым «Поро кумыл» клубышкына пагален ӱжына!