Л.Н.Матвеевалан — 65 ий!

  Кылме тылзын кудымшо кечынже Чуксола книгагудышто «Тыланетше – 65!» юбилей кас эртаралте. Тиде пайрем  «1 Май!» колхозын ветеран Советым вуйлатен шогышо Любовь Неофидовна Матвеевалан пӧлеклалтын ыле. Книгагудо пашаен Л.И. Соколова Любовь Неофидовналан кок фотоальбомым келыштарен, почеламут корныла дене сылнештарен возен пӧлеклен, тыгак пайрем кас программым ямдылен. Шуко уна–влак лийыныт: «1 Май» колхоз председатель А.А. Новиков,

«1 Май» колхозын   отдел кадрым  вуйлатен шогышо М.Г. Потапова, тыгак колхозын сакретарьже М.Ю. Анисимова, «1 Май» колхозын инженер–строительже Н.В. Смородинов, тӱҥ агрономжо – А.Н.Курбатов да молат. Торъял поселко гычат саламлаш толшо–влак шукын лийыныт. Нунын кокла гыч палемден кодаш кӱлеш пагалыме унанам З.И. Яндуловам. Тудо У Торъял Совет ветеран лум дене Т.С. Бирюкова деч салам шомакым конден, пӧлекым кучыктыш.

  Тыгак пайрем касым сӧрастараш З.И.Демидован вуйлатен шогымо «Ош куэ» ансамбльже, У Торъял посёлок гыч Елена Желонкинан вуйлатен шогымо «Вӱд йогын» ансамбльже  полшеныт. Нунылан пеш кугу таум каласыме шуэш.

  Любовь Неофидовнан илыш корныжым шымлен лекме годым фоторядым ончыкташ Чуксола клубысо пашаеҥ Л.И. Федотова пеш полшен. Тыге пырля чылан погынен чапле юбилей касым эртарен колтышна, шукылан, очыни, Л.Н. Матвеевалан шарнашыже кодеш.

  Эше каласен кодаш кӱлеш тудым, пайрем касым эртарен колташ, ӱстел тич чесым погаш Чуксола книгагудо пелен погымо «Поро кумыл» клубыш коштшо йолташыже–влак пеш тыршеныт. Тиде клубым вуйлатыше семын, эше ик гана Любовь Неофидовнам уло чон дене шокшын саламлем да тыгеракын каласем:

65 ий кӱчык корно огыл,

Ятыр йӱшто, шокшыжат пернен.

Шере–кочо илыш корнын торсыр

Ышт керт тыйым садак пӱгыртен.

Лий эре тыгаяк поро, ныжыл,

Тек чал пырче возын вуйышкет.

Кажныжлан кӱлеш таза улмет.

Ынже воло поро кумылет.