Пайремда дене, сулло канышыште улшо–влак!

  Шыжа тылзын икымше кечынже Чуксола тӱвыра пӧртыштӧ «Пайремда дене, сулло канышыште улшо–влак!» пайрем вашлиймаш эртаралте. Тиде пайремлан  чыланат пеш  ямдылалтынна. Чуксола книгагудышто йоча–шамыч дене пырля кавун гыч матрёшка–влакым краске дене сӱретлен сӧрастаренна. Тыгак йоча–шамычын «Шӧртньӧ шыже!» сӱрет выставкым ыштыме. Тӱвыра пашаеҥ–влак З.И. Демидова ден Л.И. Федотова чыла зал–влакым, фойем, сценым сӧрастареныт. «Поро кумыл» клубыш коштшо весела вате–влак «Шыжын пӧлекше» пакчасаска выставкым ыштеныт, тӱрлӧ шке пакчаште ончен куштымо пеледыш, кушкыл–влак дене сылнештареныт. Эн ондак толшо–влак выставкым онченыт, а вара пайрем вашлиймаш тӱҥалын. 

  Вӱдышӧ книгагудо пашаен Л.И. Соколова сулло канышыште улшо, «1 Май» ялозанлык пашаеҥ-влакым, ача-авам да толшо уна–влакым пайрем дене саламлен. Вашлиймашым шке возымо почеламут корнылаж  дене тӱналын ыле:

Уремыште шыже коштеш,

Колында, кузе тудо шортеш?

Ик йомакым ковам каласен,

Таче тыланда ойлен пуэм.

А лийын тиде тунам,

Кунам мемнан дечын

Мотор кенеж чеверласен,

Кидшым лупшалын, эртен каен…

   Шӧртньӧ шыже толмо дене пакчаштына саска шуэш, а нурышто пырчым поген налыт, адакшым шыже тӱрло пайремлан  пеш поян. Шыже толмо дене теве сулло канышыште улшо–влакынат пайремыш толын шуын.

  Саламмутым эн ондак Л.И. Гродикова нале, а вара  сулло канышыште улшо–влакым уло кумылын Т.С. Бирюкова саламлыш. Тудын почеш Л.Н.Матвеевалан («1 Май» колхозын ветеран советшым вуйлатыше) шомак пуалте. Тудат чылаштым пайрем дене шокшын саламлыш да Чуксола книгагудо пелен пашам ыштыше «Поро  кумыл» клубын пашаже нерген каласкалыш, презентацийым ончыктыш.

  Вара тачысе пайрем кече дене пайдаланен,  «1 Май» ялозанлыкым вуйлатен шогышо Аркадий Арсентьевич Новиков саламлаш вашкыш, тудо кӱчыкын колхоз илыш нерген палдарен кодыш.

 Тыгак саламмутым ойлыде, Чуксола ялсовет вуйлатыше Анаталий Александрович Ермаковат ыш чыте.

  А.А. Новиков пайрем вашлиймашым сӧрастараш Йошкар–Ола гыч Марий самырык театрын артист–влакшым кӱштен ыле.  Нуно (Л. Купсольцева, С. Устюгов, Т. Пашкина, А. Мамаев) пеш чапле мурпӧлекым тӱвыра пртыш погынышо влаклан ыштышт. Весела пайрем вашлиймаш умбакыже кочмыверыште шуйнен. Тыгай чапле пӧлекым шке ончычсо пашаеҥже-влаклан  «1Май» ялозанлыкым вуйлатен шогышо А. А. Новиков ыштен. Тудлан пеш кугу тау мутым чылан ойлат.

  Те сулло канышыште улшо, ончычсо пашазе–влак, шке тазалыкдам чаманыде, тамле омыдам коден, шуко ий тыршен пашам ыштенда, мӧнгыштат чыла сомылым шуктенда. Ме, самырык тукым, тендан пеҥгыдылыкда, пашам йӧратымашда дене кугешнен илена да мланде марте ончылныда вуйнам савена. Тек ончыкшым илышдам кечан ош кече, чевер–ал ӱжара, лыжга лай мардеж, яндар памаш шинча да сылне марий муро курымеш волгалтарен шогат.

Уремыште шыже коштеш,

Колында, кузе тудо шортеш?

Ик йомакым ковам каласен,

Таче тыланда ойлен пуэм.

А лийын тиде тунам,

Кунам мемнан дечын

Мотор кеҥеж чеверласен,

Кидшым лупшалын, эртен каен.

Сылне ужар тӱсым,

Шокшо чевер кечым,

Ныжыл лывым, кайык–вӱсым

Пеленже поген наҥгаен.

Кенета кеҥеж почеш

Шыже шыпак лишемеш.

Омса воктеке шогалеш,

Йӱкын: «Пуртыза!» — манеш.

Кап–кап, — омсам пералта,

Кап–кап, адакат шокта.

Иктат шыжым огеш чамане,

Омсаш пурташ нигӧ ок вашке.

Шукынжо тудым вурсат,

Шыже огеш кӱл, шонат.

Теве ик гана мыят

Колынам кузе ойлат:

— Шыже ночко, лавыран,

Йӱран игечылан поян.

Икте кеҥежым мокталта,

-Йӱштылаш келша, — ойла.

Весе телым пыдалеш,

-Ече ден кошташ лиеш.

Кумшо утыр кычкыра:

-Шошо эшеат сайрак,

Толжо веле вашкерак!

Уремыште шыже шкетын коштеш,

Ойгыра да йӱкын мӱгырен шортеш.

Айста шыжым тышке пуртена,

Айста тудым ме чаманена.

Шыжым ме чаманена,

Тудлан омсам почына.

Тек мемнан деке пура!